Mənzillərin kirayəsi - yeni trend, tələbat, bazarda dəyişikliklər

Saytımızın Dəyərli Ziyarətçiləri,

“Remax Premium” Rieltor Şirkətinin Direktoru Rəşad Qasımovun daşınmaz əmlak bazarında kirayə məsələləri ilə bağlı ekspert rəyini sizə təqdim edirik.

 

 

 

Müsahibə

Hörmətli Rəşad müəllim, xahiş edirik şirkətiniz barədə qısa məlumat verəsiniz.

Remax Premium olaraq, Azərbaycan əmlak bazarında artıq 6 aya yaxındır fəaliyyət göstəririk. Remax Premium dünyanın ən böyük şəbəkəsinə sahib Remax şirkətinin Bakı ofisidir. Əsas məqsədimiz Azərbaycan əmlak bazarında daha peşəkar və dünya standartlarına uyğun xidmət göstərmək. 

 

Fikrinizcə hal-hazırda Azərbaycanda daha çox köhnə tikili və ya yeni tikili binalarda kirayə verilən əmlaka tələbat var? Mümkündürsə rəyinizi izah edin.

Kirayə bazarı deyəndə biz bunu iki yerə bölürük. Birincisi yerli əhalinin kirayə tələbatı,İkinci isə xarici vətəndaşların kirayə tələbatı mövcuddur. Birinci kateqoriyalı müştərilərin daha çox köhnə tikililələrə və aşağı büdcəli kirayələrə tələbatı var. İkinci kateqoriyalı isə daha çox yeni tikililərdəki əmlaklara maraq göstərir. İkinci kateqoriya müştərilərin artıq müəyyən bir büdcə məhdudiyyəti olmasına baxmayaraq birinci kategoriyadan daha yüksək olduğunu qeyd etməliyəm.

 

Biz hammımız xatırlayırıq ki, təxminən 10 il bundan əvvəl kirayə verilən evlərin əksər sayı əşyalarsız verilirdi. Lakin bu günlərdə tendensiya artıq tamamilə başqadır. Fikrinizcə bu trend rəqabətçilik faktoru ilə əlaqədar yaranıb və ya səbəb kirayə götürənlərin tələbatlarının artımındadır?

Bəli, tamamilə doğrudur. Mövcud kirayə bazarında təklif olunan daşınmaz əmlakların 100 faizə yaxını əşyalarla birlikdə verilir. Rəqabətdən ziyadə kirayə götürənlərin əksər hissəsi xarici olduğu üçün tələbdən irəli gəlir. Bunu trenddən ziyadə ehtiyacdan doğduğunu qeyd etmək lazımdır. Adətən yerli əhali əşyasız evləri kiralamaqda meyllidir. Bu baxımdan bunun trendlə deyil, müştərinin tələbindən irəli gəldiyini qeyd etməliyik.

 

Sizin şirkətin statistikasına əsasən kirayə götürülən mənzillərin sayı artmaqdadır, yoxsa yuxarı istiqamətlənən trend artıq stabilləşib?

Hal-hazırda kirayə təklifləri çoxalır və çeşidlənir. Bu bir faktdır. Lakin bəzən təklif olunan mənzillər mövcud tələbə uyğun olmur. İstər mənzilin sahəsi olsun, istər istənilən kirayə haqqı məbləği olsun, istərsə də mənzilin interyer dizaynı olsun. 

 

5 il sonra daşınmaz əmlak bazarında hansı dəyişiklikləri gözləyirsiniz?

Azərbaycan əmlak bazarı ümumiyyətlə cox dinamikdir. Əslində əmlak bazarında dəyişikliklər sadəcə ölkəmizdə deyil dünyanın inkişafda olan ölkələrinin hamısında daim dəyişir. Dəyişiklik sadəcə kəmiyyət olaraq deyil, əsas keyfiyyət olaraq həyata keçir. Azərbaycan əmlak bazarı da əslində o qədər də böyük olmadığından, burdakı dəyişikliklər daha tez baş verir. İlk dəyişiklik önümüzdəki 3-5 ildə yeni tikililərin konseptual dəyişikliyi olacaq. Yəni artıq tək bina dövrü sona catacaq və yaşayış kompleklsləri daha tələb olunan bir əmlak olacaq. İkinci çox vacib dəyişiklik yeni tikililərdəki mənzillərin “planirovkası” ilə əlaqədardır. Yəni yerli inşaat şirkətləri layihələrində artıq daha erqonomik mənzillər təklif etməlidirlər,çünki müstəqillik dövründə tikilən yeni binaların ən böyük əksikliyi mənzil sahələrindəki itkilər idi. Bu da əsasən memarların təcrübəsizliyindən və sahibkarların bu sahədəki bilgisizliyindən qaynaqlanır. Və nəhayət gözlənilən bir sonrakı dəyişiklik yer məsələsi. Bugün artıq şəhər mərkəzi anlayışı dünyada dəyişib. Böyük şəhərlərdəki fərqli şəhər mərkəzlərinin yaranması yeni trendinin Bakıda tətbiq edilməsi qaçınılmazdır. 

 

 

Tarix: 04.11.2014

 

Ekspert Rəyi rubrikasına qayıtmaq