Əmlak bazarında qiymətlər hansı səviyyədədir

Saytımızın Dəyərli Ziyarətçiləri,

“BNS” rieltor şirkətinin rəhbəri Raya Məmmədovanın daşınmaz əmlak bazarında cari qiymətlər ilə bağlı qısa ekspert rəyini sizə təqdim edirik.

 

 


Müsahibə

Hörmətli Raya xanım, Siz elit və ekonom əmlak bazarında hazırki vəziyyəti necə dəyərləndirərdiniz? Tendensiyalar, tələbat barədə bizə məlumat verərdiniz?

Rusiyada müşahidə olunan inflasiya, neftin qiymətində azalma və sair amillər əmlak bazarında vəziyyətin kifayət qədər qəliz olduğunu söyləməyə imkan verir. Lakin eyni zamanda həm elitar həm də ekonom sinfinə aid olan əmlaka tələbat mövcuddur. Lakin müxtəlif şaiələr və qiymətlərin ucuzlaşacağı barədə mütəmadi olaraq dolaşan xəbərlər potensial müştərilər arasında təşvişin yaranmasına gətirib çıxarır.

 

Qeyd etdiyiniz kimi, qiymətlərin ucuzlaşması barədə xəbərlər dolaşır. Bu xəbərlərlə bağlı fikirlərinizi bilmək oxucularımız üçün maraqlı olar?

Mən hesab edirəm ki, qlobal ucuzlaşmanı gözləmək olmaz. Mən əmlak sahəsində 1998-ci ildən etibarən çalışıram. Vaxtaşırı, müəyyən səbəblərdən durğunluq periodları olur. Mövcud qiymətlərlə bağlı deyə bilərəm ki, qaynar təkliflər hər zaman mövcud olur, var və olacaq. Bu biznesin qanunudur. Elit əmlaka hər zaman tələbat var, təkliflərin sayı azdır, hər kəs ən gözəl əmlakı ən aşağı qiymətlə əldə etmək arzusundadır. Lakin belə olmur. Nəzərə alsaq ki, Bakının mərkəzində sadəcə olaraq kotlovanı qazılmış binada 1 kv.m. qiyməti 1500-1600 manat təşkil edir, müştərilərimizin həmin qiymətə təhvil verilmiş, hazır binada mənzil əldə etmək istəyi bəzən anlaşılmaz olur. Sözsüz ki dediyim kimi, variantlar var, lakin bəzən onlar da müştərilərimizi qane etmir. Hər kəs pəncərəsindən dənizi görmək istəyir. Lakin belə olmur, kimsə Qütb parıltısınada baxmalıdır. Təkrar əmlak bazarına gəldikdə, burada da qiymətlər layihədən, yerləşmədən asılıdır.

 

Portalımızın istifadəçilərini maraqlandıran əsas mövzulardan biri, qiymətlərin formalaşması prinsipidir. Qiymətin formalaşmasına hansı amillər təsir edir?

Bakının 1-2 mərkəzlərində ilkin əmlak bazarında qiymətlər 1550-5000 manat civarında dəyişir. İlk növbədə qiymətlər binanın yerləşdiyi ərazidən, təmirdən və panoramadan asılıdır. İstənilən halda, dəniz mənzərəli mənzili almaq istəyən kifayət qədər şəxs var. Təkrar əmlak bazarına gəldikdə isə, söyləyə bilərəm ki, bu tip əmlaka olan tələbat ilkin əmlaka olandan aşağıdır və bu bir çox amillərlə bağlıdır. Müştəriləri anlamaq olar, hər kəs komfort, rahatlıq, iri mətbəx və gözəl infrastruktur arzusundadır. Bir çox hallarda bu tip mənzillər ipoteka krediti vasitəsi ilə əldə edilir. Bəzən bu mənzillərin parametrləri ipoteka şərtlərinə uyğun gəlmir. Təkrar əmlaka olan tələbat əsasən söküntü işləri aparılan zamanı artır. Təkrar əmlak bazarında qiymətlər yerləşməsindən, layihəsindən və vəziyyətindən asılı olaraq 900 manatdan başlayır. Hal-hazırda Bakıda, 1-ci mərkəzdə yerləşməyən, lakin tələbat yüksək olan bir çox elit komplekslər inşa edilib.

Qiymətlərin formalaşmasına təsir edən amillər yerləşmə, binanı inşa edən təşkilat, layihə, infrastruktur, yol, həyətin, uşaq meydançasının, parkinqin mövcudluğu, sənədləşmə, təmir kimi amillərdir.

 

Facebook səhifəmizin istifadəçiləri tez-tez qardaş Türkiyədə əmlak qiymətlərinin Bakı ilə müqayisədə aşağı olduğunu yazır. Bu barədə fikirlərinizi bizimlə bölüşməyinizi xahiş edirik.

Bilirsiz, elit, komfortlu mənzil Azərbaycandada, Türkiyədədə, Avropadada eynidir. Elit mənzillərin qiyməti hər zaman yüksək olur. Mən tez-tez xaricə səfər edirəm, oradakı qiymətlərlə maraqlanıram. Qiymətlər mənzilin yerləşməsindən asılı olaraq dəyişir. Məgər Azərbaycanda şəhər kənarında və bölgələrdə aşağı qiymətə mənzillər satılmır? Məgər bu mənzillər alınmır? Sadəcə olaraq hər kəs mərkəzdə və ucuz qiymətə mənzil əldə etmək istəyir. Bu vəziyyəti eynən digər ölkələrdə də görə bilərik. Türkiyədə, Bosfor sahilində mənzillərin qiymətləri milyonlar təşkil edir. Bir çox hallarda qeyd edilən münasib qiymətlər Türkiyənin istirahət, kurort zonalarında müşahidə olunur, hansılar ki, yalnız yayda yaşamaq üçün münasib olur. Analoji vəziyyəti mən Azərbaycanın əmlak bazarında da görürəm.

 

Siz Azərbaycanın əmlak bazarını 5 il sonra necə görürsünüz? Müsbət dəyişikliklər, yeni tendensiyalar gözləyə bilərikmi? 

Onu söyləyə bilərəm ki, tikinti sektoru inkişaf edir, zaman keçdikcə bazarda əlverişli, keyfiyyətli təkliflərin sayı artacaq. Ağıllı adamlar hər zaman daşınmaz əmlaka yatırım edir.

 

Tarix: 10.02.2015

 

Ekspert Rəyi rubrikasına qayıtmaq