Şəxsi ev və ya mənzil?

  Şəxsi ev – bu sözü eşitdikdə ağlımıza ilk olaraq nə gəlir? Təsəvvürümüzə ilk növbədə gözəgəlimli ev, ətrafında yaşıllıq dolu çəmən, alçaq hasar və uşaq yelləncəyi gəlir. Lakin heç də hər kəsin fantaziyası eyni deyil. Bir çox insanlar hündürmərtəbəli binada geniş mənzili şəhər kənarında yerləşən şəxsi evdən daha üstün tutur. Gəlin şəxsi evdə və ya mənzildə yaşamağın hansının daha üstün olması barədə birlikdə düşünək.

  

Başlayaq ən əsasından – maliyyə vəsaitindən

  Misal üçün, hal-hazırda Bakıda 1 sot torpağın orta qiyməti 19,000 dollar təşkil edir, adətən ev tikmək istəyən şəxslər 6 sot torpaq alır. Yəni təkcə torpağın alınmasına 114,000 dollar vəsait xərclənəcək, bundan əlavə sözsüz ki tikinti materialları, sənədləşdirmə və infrastrukturun çəkilməsinə çəkilən xərclər. Bunların hamısını minimal qiymətlə hesablasaq belə evin qiyməti 150,000 dollara çatacaq. İndi isə mənzilin neçəyə başa gəldiyini hesablayaq. Təhvil verilməmiş binada mənzilin bir kvadrat metrini 1000 dollara əldə etmək mümkündür, təhvil verilmiş binada bu qiymət daha yüksək olacaq. Sözsük ki, təmir xərcləri də nəzərə alınmalıdır. Xərclər şəxsi evin inşası zamanı çəkilənlərdən xeyli aşağı olacağı aydındır.

Baxım və texniki qulluq

  Bunlardan əvvəl diqqət tələb edən məsələlərdən biri mənzilə və şəxsi evə qulluq və xidmətlərdi. İstənilən yaşayış sahəsi mütəmadi olaraq təmir, köhnəlmiş konstruksiyaların yenilənməsini və təmizlik işlərinin aparılmasını tələb edəcək. Mənzil şəraitində bütün bu məsələlərin həlli ev ilə müqayisədə daha asan başa gəlir. Təmizlik işlərində böyük fərq müşahidə olunmasa da, su təhcizatı, isitmə və kanalizasiya sistemlərinin düzgün fəaliyyətinin təmin olunması kifayət qədər böyük vəsait tələb edə bilər. Mənzil sahibi olduğunuz təqdirdə isə bütün bunlar sizin deyil, idarəedən təşkilatların kompetensiyasında olan məsələlərdi.

Komfort

  Komfort amilini də unutmaq lazım deyil. Şəxsi evin mənzil qarşısında üstünlüyü odur ki, ağır iş günündən sonra evə gəlib rahatlıq tapan zaman, sizi mübahisə edən qonşuların səsi, qonşunun uşağın ağlaması və ya musiqi səsləri narahat etmir, üst mərtəbədə yaşayan qonşular sizin evinizə su axıtmır və sair. Evin ətrafında ucaltdığınız hündür hasar sizi maraqlı qonşuların baxışlarından və ümumiyyətlə ərtaf dünyanın problemlərindən qoruyur.

Mühafizə

  Komfort məsələsi avtomatik olaraq təhlükəsizlik məsələsinə gətirib çıxarır. Mənzil şəraitində möhkəm seyf qapısı və aşağı mərtəbələrdə yaşadığınız təqdirdə pəncərələrə barmaqlıqların vurulması kifayətdir. Bundan əlavə, demək olar ki bütün hündürmərtəbəli binalarda mühafizəçilər çalışır və qonşular da hər hansı bir hadisə baş verdikdə imdadınıza yetişə bilər. Şəxsi evdə isə təhlükəsizliyin təmin olunması üçün əsaslı çalışmaq lazım olacaq. Hündür və möhkəm hasar, pəncərələrdə barmaqlıqlar, möhkəm qapılarla yanaşı bəzən siqnalizasiya və videomüşahidə sistemi quraşdırılır, və mühafizə üçün xüsusi şəxslər tutulur – bütün bunlar isə əlavə xərclərdi.

Kommunal xərclər

  Kommunal xərclər (işıq, qaz, su, isitmə) adətən ayda bir dəfə ödənilir. Şəxsi mənzildə ödəniləcək bəndlər mənzilə nisbətdə daha azdır. Şəxsi mənzil sahibləri liftin təmiri, blokun təmizlənməsi və sair əlavə xərclər ödəmir.

Zaman

  Əgər siz istənilən halda şəxsi evdə yaşamaq qərarını qəbul etmisinizsə, zaman amilini nəzərə almaq çox vacibdir. Evin inşası bir ildən artıq zaman tələb edə bilər. Mənzildə isə bu zaman xeyli aşağı ola bilər. Vəsait və istək var, bazarın monitorinqi, ərazi seçimi aparılır və mənzil alınır. Təmirsiz mənzil üçün 6 ay vaxt kifayətdir, təmirli mənzilə isə alındıqdan dərhal sonra köçmək olar.

  Həm mənzilin həm də şəxsi evin öz mənfi və müsbət cəhətləri var və hansı növ yaşayış sahəsini əldə etmək hər birimizin şəxsi seçimidir. Ev alındıqdan sonra mənzil sahibi özünü həmin evdə rahat hiss edirsə, deməli onun seçimi doğrudur.

 

Məqalə T.Kərimxanova tərəfindən hazırlanmışdır, xüsusi olaraq www.evelanlari.az layihəsi üçün 
Tarix: 26.01.2015

 

Məqalələr rubrikasına qayıtmaq