Dolların məzənnəsi və ya mənzillərin qiyməti – hansı daha sürətlə artacaq?

  Son bir həftə ərzində Azərbaycanda dolların məzənnəsinin artması ilə əlaqədar olaraq, əhali arasında güclü narahatlıq hissi yaranıb. Hər kəs bilir ki, bu cür hallar iqtisadiyyatın bütün sahələrində inflyasiyaya gətirib çıxarır. Və sözsüz ki bu hal daşınmaz əmlak bazarında qiymətlərin artımına gətirib çıxaracaq. 

  Şənbə günü, fevral ayının 21-i tarixində Mərkəzi Bank dolların məzənnəsini 1.05 manat səviyyəsində təyin etdikdən sonra qiymətlər artmağa başladı. Ərzaq dükanlarında qiymət artımı müşahidə olunmağa başladı, farmasevtik məmulatların əksər hissəsinin xaricdən idxal olduğunu nəzərə alan bir çox apteklər ümumiyyətlə fəaliyyətini dayandırdı, tütün məmulatlarının və məişət texnikasının qiymətləri artdı.

  Daşınmaz əmlak bazarıda bu tendensiyadan kənarda qalmadı. Belə ki, Neftçilər metrosunun yaxınlığında inşa edilən kompleksdə, mənzilin bir kvadrat metrinin qiyməti yanvar ayında 800 manat təşkil edirdisə, bu gün bu rəqəm artıq 1050 manat təşkil edir. Gözləmək olar ki, tikinti şirkətləri bundan sonra da qiymətləri artırmaqda davam etsinlər. Nəzərə alsaq ki bir çox tikinti materialları xaricdən idxal olunur, bəzi layihələrin dayandırılması da gözlənilir, bu isə təhvilvermə müddətinə təsir göstərəcək.

  Dolların məzənnəsinin artması, daşınmaz əmlak bazarının bütün sahələrinə təsir edəcək: yeni və köhnə tikililər, icarə və torpaq sahələri. Siz yeni mənzil almaq arzusu ilə manatla pul toplayırdınızsa, 20% daha artıq məbləğə gərək olacağını gözləyə bilərsiniz.

  Mənzillərin dəyərini hissə-hissə ödəyən şəxslər ödənişləri sürətləndirməlidir. Son zamanlar bir çox tikinti şirkətləri mənzilləri bir-iki illik kreditlə müştərilərə təklif edirdi. Ən çox itirən şəxslər isə mənzil alışı üçün dollarla kredit götürən şəxslər olacaq, onların ümumi borcu bir anda xeyli artmış oldu. Bu səbəbdən borcu olan şəxslər borclarını ən qısa müddətdə ödəməyə cəhd edəcəklər.

  Daşınmaz əmlak bazarı üçün proqnozlar daha çox pessimistikdir. Bir çoxlarının gözlədiyi qiymət azalmasını unutmaq və qiymətlərin çox artmayacağına ümid etmək lazımdır. Ehtimal edilir ki, bir çox mənzillər bundan sonra dollar və ya avro ilə təklif olunacaq. Daşınmaz əmlak bazarında tələbatın azalmasına baxmayaraq, qiymət azalmasına ümid etmək olmur.

  Bu vəziyyətdə mənfəət əldə edən yalnız ipoteka kreditini manatla alan şəxslərdir. Əldə etdikləri mənzilin qiyməti artdığı halda ödənişləri eyni səviyyədə qalacaq.

  Sizə bu vəziyyətdə tövsiyyəmiz, maliyyə vəsaitiniz olduğu təqdirdə onu daşınmaz əmlaka yatırmaq, əks halda isə gözləmə pozisiyası tutmaqdır. 

 

 

Məqalə T.Kərimxanova tərəfindən hazırlanmışdır, xüsusi olaraq www.evelanlari.az layihəsi üçün 
Tarix: 26.02.2015

 

Məqalələr rubrikasına qayıtmaq