Mansarda – almaq və ya vaz keçmək ?

  Mansardda yerləşən mənzili alıb-almamaq barədə düşünməzdən öncə, mansard deyildikdə nəyin nəzərdə tutulduğunu təyin edək. Son illərdə müasir inşaatda mansardlardan istifadə geniş yayılıb, lakin Bakıda mansard dedikdə adətən binanın son mərtəbəsi nəzərdə tutulur. Məlum olmayan səbəblərdən bu tip mənzillərin qiyməti eyni binada yerləşən digər mənzillərdən 30% və hətta 50% aşağı olur. 

  Bir çoxları mansard dedikdə binanın son mərtəbəsində yerləşən sahəni nəzərdə tutur. Hətta elan tərtib edildikdə mansard deyil, məhz binanın son mərtəbəsi qeyd olunur. Mansardın ümumi qəbul olunmuş tərifi – tavan altında yerləşən sahədir. Mansardın tavanı da müvafiq şəkildə boşluq olmaqla inşa edilməlidir. Bu tip ərazi yaşayış sahəsidir, yəni sırf yaşayış üçün inşa edilir. Bu sahədə yerləşən mənzillərin sənədləri də digər mənzillərin sənədlərindən heç nə ilə fərqlənməməlidir.

  Lakin bir çox hallarda mənzil alıcıları bu tip mənzillədən uzaq durur – buna səbəb lazımi sənədlərin olmaması və köçürülmə qorxusu, halbuki Bakıda sakinlərin mansardda yerləşən mənzillərdən məcburi çıxarılması halı müşahidə edilməyib.

  Qiymətlərin cəlbedici olmasına baxmayaraq bir çox potensial alıcılar bu cür mənzilləri almaqdan vaz keçir, əsas səbəb isə sənədləşmə ilə bağlıdır. Halbuki Bakıda yerləşən yeni tikililərin 50%-dən artığında sakinlər çıxarış olmadan, mənzil-tikinti kooperativinin verdiyi müqavilə əsasında yaşayır. Bəzi hallarda mansard texniki mərtəbə kimi deyil, məhz yaşayış mərtəbəsi kimi rəsmiləşdirilir və mənzillərə çıxarış təqdim olunur. Bəzi hallarda mansard adı ilə alıcılara adi mənzil kimi rəsmiləşdirilməsi mümkün olan “əlavə” mərtəbədə yerləşən mənzillər təklif olunur. Kommunikasiyalar (qaz, su, işıq) digər mərtəbədə olanlardan seçilmir.

  Sözsüz ki, istənilən mənzil kimi, mansardın öz müsbət və mənfi cəhətləri var. Müsbət cəhətlərdən gözəl mənzərəni və üst qonşuların yaratdığı səs-küydən uzaq olmağı qeyd edə bilərik. Mansarda xas olan bucaq altında inşa edilən divarlar və mansard pəncərələrinin yaratdığı qeyri-adi dizaynıda müsbət cəhətlərə aid etmək olar. Və sözsüz ki, eyni binada yerləşən digər mənzillərdən təxminən 30% aşağı olan qiymətlərdə müsbət haldır.

  Lakin bütün bunlarla yanaşı mənfi cəhətlərdə az deyil. Binanın tavanında hər hansı problem yaşandıqda bunu ilk növbədə məhz mansard sakinləri hiss edir. Tavan dama bilər, termoizolasiya məsələlərinin də ən çox təsir etdiyi məhz mansard sakinləridir – yayda bu mənzillərdə digərləri ilə nisbətdə daha isti, qışda daha soyuq olur. Həmçinin demək olar ki bütün mansardlarda eyvan nəzərdə tutulmur. Daha bir mənfi məqam onunla bağlıdr ki, adətən lift mansarda qədər hərəkət etmir.

  Beləliklə bütün mənfi və müsbət cəhətləri araşdırdıqdan sonra söyləyə bilərik ki, bu tip mənzillər daha çox məişət çətinliklərindən qorxmayan və nisbətən az vəsaitə sahib olan gənc ailələr üçün yararlı ola bilər. Mənzilin aşağı qiyməti əsas üstünlük hesab edilə bilər.  

 

Məqalə T.Kərimxanova tərəfindən hazırlanmışdır, xüsusi olaraq www.evelanlari.az layihəsi üçün 
Tarix: 14.03.2015

 

Məqalələr rubrikasına qayıtmaq