Bağ evi necə olmalıdır?

  Yay mövsümü yaxınlaşır və bu mövsümü necə keçirmək sualı aktuallaşır. Maddi imkanı olanlar istirahətini ölkə hüdudlarından kənarda keçirməyə planlaşdırır, digərləri isə doğma Xəzər sahillərini və ya bağ evlərini seçir.

  Bağ... Bağ necə olmalıdır? Hər kəsin bu barədə öz təsəvvürü var. Bəziləri bağ dedikdə hovuzlu, saunalı, dizayner tərəfindən salınmış bağçası olan üçmərtəbəli villanı, bəziləri isə kiçik ikiotağlı ev, kiçik gül bağçası və bir neçə meyvə ağacını təsəvvür edir. Təmirindən və ölçüsündən asılı olmayaraq bağ ilk növbədə yaşayış üçün rahat olmalıdır.

  Bağ seçimində onun yerləşməsi ən əhəmiyyətli məsələlərdən biridir. Hazır bağ evi və ya boş torpaq sahəsi alındıqda onun yerləşməsinə, əsas yola yaxınlığına, kommunal infrastrukturun mövcudluğuna, yaxınlıqda mağazaların olub-olmamağına və ən nəhayət qonşuların kimliyinə fikir verilməlidir.

  Həmçinin əldə etmək istədiyiniz sahədə hansı tip torpağın olması vacibdir. Böyük ehtimalla siz bağ arzu edəndə kölgəsində istirahət edəcəyiniz ağacların mövcudluğunu xəyal edirdiniz, qızmar yay günlərində kölgə tapmayıb evdə gizlənmək o qədər də ürəkaçan perspektiv deyil. Həmçinin nəzərə alınması vacib olan məqamlardan biri dənizə yaxınlıqdır. Sözsüz ki, ideal bağ dənizə yaxın, ayaqla 15-20 dəqiqə ərzində qət edilə biləcək məsafədə yerləşməlidir.

  Qeyd etdiklərimizdən əlavə nəzərə almaq lazımdır ki, bağ təkcə ailənizin istirahət yeri deyil. Siz bağınıza dostlarınızıda dəvət edəcəksiniz və bu məqam mütləq nəzərə alınmalıdır, bağ inşa edildiyi zaman kifayət qədər yaşayış sahəsi, həm manqal üçün sahə həm də uşaq meydançası üçün sahələr nəzərdə tutulmalıdır. Bir çox hallarda bağ evi, yalnız yay aylarında yaşayış mümkün olan kiçik bir evdir. Buraya şəhərdə gərək olmayan, artıq əşyalar yığılır - köhnə mebeldən tutmuş, istifadə edilməyən qab-qacağa qədər. Kommunikasiyalardan, əksər hallarda yalnız su və işıq xəttləri, həmçinin kanalizasiya çəkilir.

  Lakin son zamanlarda bu tendensiyanın dəyişməsini müşahidə edirik, bu isə öz növbəsində daha çox ailələrin bağı almaq deyil, yay aylarında kirayə götürməyi üstün tutması ilə bağlıdır. Sözsüz bağınızın şəraiti nə qədər gözəldirsə potensial müştəridən tələb edəcəyiniz məbləğdə o qədər yüksək olacaq.

  Bütün dediklərimizi ümumiləşdirsək ideal bağ düsturunu bu cür görə bilərik - bir və ya ikimərtəbəli, sahəsi 100-150 kv.m. təşkil edən, bütün infrastruktura malik, terassalı və kiçikdə olsa bağçası olan və ən nəhayət möhkəm hasarla əhatə olunmuş ev. Hasar qala divarlarını xatırlatmasa da olar, hündürlüyü 2 metr təşkil edən güvənli daş hasarın olması kifayətdir. Həmçinin evin qarşısında əyləşmək, uşaq yelləncəyi quraşdırmaq, manqal qurmaq mümkün olan meydançanın mövcudluğu bağınıza xüsusi gözəllik verəcək. Və sözsük ki dənizə yaxınlıq.  

  Lakin bir məqamı da mütləq yadda saxlamaq lazımdır ki, bağ evinin hansı şəraitə malik olmasından asılı olmayaraq, istirahət ayları bağınızın abadlaşdırılmasına sərf etdiyiniz vaxt deyil, məhz istirahət olmalıdır. 

 

Məqalə T.Kərimxanova tərəfindən hazırlanmışdır, xüsusi olaraq www.evelanlari.az layihəsi üçün 
Tarix: 24.04.2015

 

Məqalələr rubrikasına qayıtmaq