“Azerbaijan Insurance Broking” şirkəti ilə müsahibə

Saytımızın Dəyərli Ziyarətçiləri,

“Azerbaijan Insurance Broking” Sığorta və Təkrar Sığorta Brokeri Şirkətinin Direktoru Əbülfəz Müslüm oğlu Şıxı ilə daşınmaz əmlak bazarında əmlak sahiblərinin risklərdən qorunması üçün sığorta məsələləri ilə bağlı qısa müsahibəmizi sizə təqdim edirik.  

Həmsöhbətimiz barədə qısa məlumat

1961-ci ildə Saatlı şəhərində anadan olmuşdur. Ali təhsillidir. 1989-cu ildə Bakı Dövlət Universitetini bitirmişdir. 1991-2001-ci illərdə AR Nazirlər Kabineti yanında Dövlət Sığorta Nəzarətində şöbə rəisi vəzifəsində və 2003-2010-cu illərdə "AXA MBASK" sığorta şirkətində çalışmışdır. 2011-ci ilin yanvar ayından etibarən "Azerbaijan Insurance Broking" Sığorta və Təkrarsığorta Brokeri Şirkətinə rəhbərlik edir.

 

Müsahibə

Hörmətli Əbülfəz müəllim, xahiş edirik qısaca olaraq şirkətiniz barədə məlumat verəsiniz.

“Azerbaijan Insurance Broking” Sığorta və Təkrarsığorta Broker Şirkəti Məhdud Məsuliyyətli Cəmiyyəti (qısa adı "AIB" STBŞ) Azərbaycanın sığorta bazarına birincilər sırasında qədəm qoymuş sığorta brokeri kimi 1998-ci ildə yaradılmışdır. Həmin ildən də şirkətə Azərbaycan Respublikası Maliyyə Nazirliyi tərəfindən sığorta və təkrarsığorta brokeri kimi fəaliyyət göstərmək üçün xüsusi razılıq (lisenziya) verilmişdir. 16 ildir ki, sığorta bazarında fəaliyyət göstərən “AIB” STBŞ Azərbaycan Respublikası və dünyanın aparıcı sığorta və təkrarsığorta şirkətləri ilə yaxından əməkdaşlıq edərək beynəlxalq, yerli korporativ və özəl müştərilərə enerji, əmlak, məsuliyyət, tikinti-inşaat, dəniz yükləri, avtomobil, işçilərin sığortası və digər icbari və könüllü sığorta növləri də daxil olmaqla sığorta xidmətlərini təklif edir.

 

Bir həftə bundan əvvəl saytımızda məqalə dərc etmişdik. Məqalənin mövzusu su axıntısı ilə əlaqədar idi və bu cür hadısə baş verdiyi zaman aşağıda yaşayan qonşu ilə normal münasibəti necə qoruyub saxlamaq, problemi necə həll etmək və s. kimi məsələlərə toxunmuşduq. Məqalə dərc olunandan sonra Facebook səhifəmizə ziyarətçilərdən suallar gəlmişdir. Əmlak sahibləri bilmək istəyir ki, daşınmaz əmlaklarını necə sığortalasınlar. Zəhmət olmasa bu barədə ətraflı məlumat verərdiniz.

Məlumat üçün bildirim ki, 2011-ci ildə Azərbaycan Respublikasının Milli Məclisi tərəfindən “İcbari sığortalar haqqında” Qanun qəbul edilmişdir. Bu Qanun Azərbaycan Respublikasında daşınmaz əmlakın icbari sığortası, avtonəqliyyat vasitəsi sahiblərinin mülki məsuliyyətinin icbari sığortası, daşınmaz əmlak sahiblərinin mülki məsuliyyətinin icbari sığortası və sərnişinlərin icbari sığortası sahəsində sığortaçılar, sığortalılar, sığorta olunanlar və faydalanan şəxslər arasında hüquqi və iqtisadi münasibətləri tənzimləməklə, onların hüquq və mənafelərinin qorunması məqsədi ilə Azərbaycan Respublikasında qeyd olunan icbari sığorta növlərinin həyata keçirilməsinin ümumi əsaslarını, həmçinin bu növlərin aparılması qaydalarını və şərtlərini müəyyən edir. Bu Qanunda nəzərdə tutulmuş icbari sığorta növləri kompleks şəkildə fiziki və hüquqi şəxslərin əmlak mənafeləri ilə bağlı məruz qaldıqları zərərlərin əvəzinin ödənilməsini təmin etmək məqsədi ilə tətbiq edilir. Mənzil və qeyri-yaşayış sahələrinin sahibləri ilk növbədə bu Qanuna əsasən öz əmlaklarını icbari qaydada sığortalamalıdırlar, yəni bundan başlamaq lazımdır. Çünki yaşayış binalarının, yaşayış evlərinin və mənzillərin icbari sığortası onların konstruktiv elementlərinə, otaqlarına, o cümlədən şüşələr də daxil olmaqla qapı və pəncərə konstruksiyalarına, su, kanalizasiya və qaz təchizatına, habelə istilik sisteminə aid borulara, rabitə, elektrik və digər naqillərinə, bəzək elementlərinə, o cümlədən bütün növ xarici, yaxud daxili mala və suvaq işlərinə, divar, tavan və döşəməyə dəyən zərərlərə təminat verir.

 

Daşınmaz əmlakın icbari sığortası üzrə sığorta məbləğləri və azadolma məbləğləri hansılardır?

Yaşayış evləri və mənzillər istisna olmaqla, digər daşınmaz əmlakın icbari sığortası üzrə sığorta məbləğləri aşağıdakı qaydada müəyyən olunur:

Tikililər və binalar üzrə – sığorta predmeti olan əmlakın yerləşdiyi yerdə eyni cür tikilinin və binanın inşasının dəyəri – bərpa dəyəri məbləğində. Bərpa dəyəri müəyyən edilərkən materialların köhnəlmə əmsalı və sığorta predmeti olan əmlakın texniki vəziyyəti nəzərə alınır;

Qeyri-yaşayış sahələri üzrə – sığorta predmeti olan əmlakın yerləşdiyi yerdə eyni cür və həmin texniki vəziyyətdə olan əmlakın orta bazar dəyəri məbləğində.

Yaşayış evləri və mənzillər istisna olmaqla, digər daşınmaz əmlakın icbari sığortası üzrə azadolma məbləği müvafiq icbari sığorta müqaviləsində razılaşdırılır. Yaşayış evləri və mənzillərin icbari sığortası üzrə sığorta məbləğləri və şərtsiz azadolma məbləğləri aşağıdakı kimi müəyyən edilir:

Bakı şəhərində yerləşən daşınmaz əmlak üzrə sığorta məbləği 25000 manat, azadolma məbləği 250 manat, cəmi sığorta haqqı - 50 manat;

Gəncə, Sumqayıt və Naxçıvan şəhərlərində yerləşən daşınmaz əmlak üzrə sığorta məbləği 20000 manat, azadolma məbləği 200 manat, cəmi sığorta haqqı - 40 manat;

Digər yaşayış məntəqələrində yerləşən daşınmaz əmlak üzrə sığorta məbləği 15000 manat, azadolma məbləği 150 manat, cəmi sığorta haqqı - 30 manat.

Bu Qanunun 39.3-cü maddəsində müəyyən edilən sığorta məbləğləri əmlakın bazar dəyərindən az olduğu hallarda da sığorta hadisəsi nəticəsində dəyən zərər sığorta məbləğindən artıq olmamaq şərtilə tam həcmdə ödənilir.

Yuxarıda qeyd etdiyim sığorta məbləğləri ilə qane olmayan mənzil sahibləri əlavə sığorta məbləği ilə mənzillərini bazar qiymətlərinə uyğun olaraq sığortalaya bilərlər.

 

5 il sonra daşınmaz əmlak bazarında sığortaçıların iştirakını necə görürsünüz?  

Statistikaya nəzər salarkən Azərbaycanın sığorta bazarında əvvəlki illərə nisbətən daşınmaz əmlakın sığortası xeyli artmışdır. Bu Azərbaycan Respublikası Maliyyə Nazirliyinin Dövlət Sığorta Nəzarəti Xidməti əməkdaşlarının sığorta sahəsində maarifçiliyin daha geniş yayılması məqsədilə vaxtaşırı Respublikamızın bölgələrində zona müşavirə-seminarlarını təşkil etməsi, İcbari Sığorta Bürosunun kütləvi informasiya vasitələrində icbari sığortaya aid reklam işləri aparması böyük əhəmiyyət kəsb etmişdir. İSB-nun üzvü olan sığorta şirkətləri də xeyli öz məhsullarını satmaq üçün əllərindən gələni əsirgəmirlər. Söz yox ki, bu işdə də nöqsan və qüsurlar olmuşdur. Amma, ümumilikdə bu sahədə xeyli inkişaf vardır. Bir neçə il bundan əvvəl Aran bölgəsində Kür və Araz çaylarının daşqınlarının, ötən ilin Şəki-Zaqatala bölgəsində baş vermiş zəlzələlərin vurduğu ziyanlardan sonra, tək Bakı şəhərində deyil, xüsusilə regionlarımızda öz mənzil və obyektlərini sığortlamaq istəyənlərin sayı xeyli dərəcədə artmışdır. Hesab edirəm ki, yaxın illərdə respublikamızın mənzil və qeyri-yaşayış obyektləri sahiblərinin böyük əksəriyyəti sığorta təminatı alacaqdır. Fürsətdən istifadə edərək, mənzil və obyekt sahiblərini əməkdaşlığa dəvət edirəm. Müsahibə ilə tanış olan hər kəsdən rica edirəm ki, hər hansı bir sualı yaranarsa, lütfən çəkinmədən bizə zəng vursunlar və ya bizim Bu email ünvanı spambotlardan qorunur. Onu görmək üçün JavaScripti qoşmaq lazımdır. elektron poçt ünvanımıza yazsınlar. 

 

Tarix: 11.09.2014 

Müsahibə rubrikasına qayıtmaq