"Azercon" şirkəti ilə müsahibə

Saytımızın Dəyərli Ziyarətçiləri,

“Azercon” tikinti şirkətinin İctimaiyyətlə Əlaqələr və Mətbuat şöbəsinin müdiri Kənan Kərimli ilə qısa müsahibəmizi sizə təqdim edirik.

 

 


Müsahibə

Hörmətli Kənan müəllim, zəhmət olmasa tikinti şirkətinizin fəaliyyəti barədə bir qədər məlumat verərdiniz.

Retro Park yaşayış kompleksinin tikintisini həyata keçirən şirkətimiz, yəni “Azercon” ASC tikinti sahəsində kifayət qədər təcrübəyə malik olan bir şirkətdir. “Azercon” ASC eyni zamanda avtomobil yollarının tikintisini də həyata keçirir. Qeyd etmək lazımdır ki, öhdəliyimizdəki layihələrin, xüsusilə də Retro Park yaşayış kompleksinin tikintisinin uğurla davam etdirilməsinin ən birinci zəmanəti çoxillik təcrübəyə malik peşəkar mühandislərimizdir. Məhz öz peşəsini gözəl bilən əməkdaşlarımızın olması və ən müasir texnika və avadanlıqlardan istifadə edilməsi, eləcə də istifadə edilən materialların ekoloji və keyfiyyət baxımından dünya standartlarına uyğun olması imkan verir ki, biz istənilən layihəni ən yüksək səviyyədə təhvil verə bilək.

 

Bakı şəhərinin sakinləri artıq xəbərdardılar ki, Ağ Şəhər layihəsi çox böyük və möhtəşəm bir layihədir və bu layihədə iştirak edən yerli və xarici tikinti şirkətlərinin sayı çoxdur. Sizin binanı digər binalardan nə fərqləndirəcək?

Retro Park yaşayış kompleksinin özünəməxsus cəhətlərindən və üstünlüklərindən danışmazdan əvvəl qeyd etmək istərdim ki, Bakı Ağ Şəhər layihəsinin bir hissəsi olmaq özü bir üstünlükdür. Çünki ümumilikdə bu layihə nəinki regionun ən irihəcmli layihəsidir, eləcə də dünyada özündən bəhs etdirəbiləcək dərəcədə əhəmiyyətli bir layihədir. Belə ki, bütün dünyanın ekoloji təmizlik məsələsində ciddi mənada səfərbər olduğu bir dönəmdə, bu layihənin hesabına ümumi ərazisi 221 ha olan böyük bir ərazi ekoloji baxımdan olduqca çirkli olan “Qara şəhər”dən “Ağ Şəhər”ə çevrilir. Bizim kompleksin üstünlüklərinə gəlincə, çox əhəmiyyətli üstünlüyümüz yerləşmə ilə bağlıdır. Belə ki, Retro Park yaşayış kompleksi Ağ Şəhərin mərkəzi küçələrindən birində yerləşir və Mərkəzi Biznes rayonu ilə qonşuluqdadır. Bundan başqa, kompleksimizə çox yaxın ərazidə orta məktəb, uşaq bağçası, klinika, ticarət və istirahət mərkəzləri olacaq. Bütün bunlar isə əlbətdəki, hər bir mənzil sahibi üçün əvəzedilməz rahatlıq deməkdir. Məsələyə daha geniş baxdıqda isə layihənin icra edilməsi ilə bağlı da mühüm üstünlüklərimiz var. Hər şeydən əvvəl, kompleksin tikintisi zamanı ərazinin seysmiklik səviyyəsi tam ciddi nəzərə alınmışdır. Tikinti zamanı istifadə edilən bütün materiallar ekoloji təmizlik və keyfiyyət baxımından dünya standartlarına uyğunluğu ilə seçilir. Hətta tikinti zamanı elə məqamlar olur ki, vaxt qazanmaq baxımından hansısa kompleksi inşa edənlər bu mərhələlərə qeyri ciddi yanaşırlar. Bunlara misal olaraq drenaj və izolyasiya işlərini göstərmək olar. Biz fərqindəyik ki, bu gün tikintinin beş gün daha tez başa çatdırılması xatirinə nələrinsə üstündən keçmək 15-20 il sonra Retro Park MTK olaraq bizə çətinliklər yarada bilər. Məhz bunu və kompleksimizdə mənzil sahibi olan insanlarımızın inamını, ən əsası isə öz keyfiyyət prinsiplərimizi nəzərə alaraq tikinti zamanı layihənin tələblərinə tam riayət etməyi özümüzə borc bilirik. Misal üçün, bünövrə qatının hazırlanması zamanı başda da drenaj məsələsi olmaqla bütün tələblər yüksək səviyyədə yerinə yetirildi. İzolyasiya işlərində isə dünyanın ən məşhur şirkətlərindən olan BASF şirkətinin məhsullarından istifadə olundu. Halbuki, bu cür məsələlərdə yol verilən çatışmamazlıqları mənzil alamq istəyən insanların ilk illərdə görməsi hardasa qeyri mümkündür. Bundan başqa, Retro Park yaşayış kompleksini prestijin yeni ünvanı kimi qələmə verməyimiz heç də qulağa xoş gəlsin deyə deyil. Belə ki, kompleksimizdə “Premium” liftlər quraşdırılacaq, hazırda davam edən tikinti işlərini isə nəinki mənzil sahibləri, eləcə də istənilən insan, günün istənilən saatında internet vasitəsi ilə canlı izləyə bilər. Bu isə təkcə müştəri məmnuniyyətinə hesablanmış bir addım deyil, bu həm də gördüyümüz işdə özümüzə güvənməyimizin göstəricisidir. Və bütün bunların yekun nəticəsi olaraq qeyd etmək istərdim ki, məhz üstünlüklərimiz sayəsində artıq mənzillərin 50%-dən çoxu satılıb.

 

Binanın təhvil verilmə tarixini və əlavə olaraq mülkiyyətçilər tərəfindən mənzillərdə təmir işlərinin başlanmasına icazənin verilmə zamanını qeyd edə bilərsinizmi?

Hazırda layihə üzrə işlərimiz tam qaydasında və vaxt planlaması baxımından əvvəlcədən nəzərdə tutulduğu kimi davam edir. Buna əsasən deyə bilərik ki, 17-18 aydan sonra Retro Park yaşayış kompleksində tikinti işləri başa çatacaq və mənzilllər sahiblərinə təhvil veriləcək.

 

Başa düşdüyünüz kimi insanların bir hissəsi mənzillərin kreditlə alınması ilə maraqlanır. Belə imkanlar varmı? Və varsa zəhmət olmasa şərtləri qeyd edərdiniz.

Biz məhz bunu nəzərə alaraq kompleksimizdə mənzil almaq istəyən insanlar üçün kreditlə mənzil almaq imkanı yaratmışıq. Belə ki, ilkin ödəniş cəmi 30% olmaqla 24 aylıq kredit mümkündür. Ən əsası isə, biz bu kredit müddəti üçün heç bir əlavə faiz tələb etmirik.

 

Fikrinizcə Ağ Şəhər layihəsinin tikinti prosesinin başa çatması yeni mərkəzin formalaşmasına təsir göstərəcək? Və Ağ Şəhəri 5 ildən sonra necə təsəvvür edirsiniz? İnsanların əksər hissəsi düşünür ki, məhz Ağ Şəhər paytaxtın yeni mərkəzi olacaq və sakinlər bu ərazidə işdən sonrakı vaxtını keçirəcəklər.

Düşünürəm ki, Ağ Şəhər doğrudan da Bakımızın yeni mərkəzinə çevriləcək. Bunu belə əminliklə deməyimin bir neçə səbəbəi var. Birincisi, hazırda Bakının mərkəzi kimi tanınan istənilən yerdə mövcud olan bütün amillər, həttda deyərdim ki qat-qat artığı Ağ Şəhərdə var. İstər dənizkənarı park amili olsun, istər müasir istirahət və ticarət obyektləri olsun, istər otellər olsun, bunların hamısı Ağ Şəhərdə mövcuddur. Daha artığı isə, bu oxşarlıqların hamısı Ağ Şəhərdə ən yeni elmi texnoloji yeniliklərin tətbiq fonunda mövcud olacaq. Yəni daha müasir, daha cazibədar, daha maraqlı və daha rahat yaşam tərzi Ağ Şəhəri bir baş daha üstün edəcək. İkincisi, Bakımızın tarixi mərkəzi var, İçəri Şəhər. Amma pərakəndə şəkildə salınmış kompleksləri nəzərə almasaq Bakımızın demək olar ki müasir mərkəzi yoxdur. Daha doğrusu, Ağ Şəhər layihəsi ortaya çıxana qədər yox idi. Amma artıq Ağ Şəhərimiz var. Hansı ki, olduqca geniş bir ərazidə planlı şəkildə, şəhər içində salınmış yeni bir şəhərdir. Və bu şəhər öz müasir memarlıq üslubu ilə nəinki Azərbaycanda və regionda, eləcə də dünyada fərqlənən bir məkandır. Yuxarıda Bakımızın tarixi mərkəzini ona görə xatırlatdım ki, bura öz tarixi əhəmiyyəti baxımından xarici qonaqları cəlb edən bir yerdir. Eyni zamanda Bakının ən müasir hissəsi olacaq Ağ Şəhər də, istər dünya səviyyəli otelləri, istərsə də biznes mərkəzləri, istirahət və ticarət mərkəzləri ilə xarici qonaqların diqqətini çəkəcək. Bu həm də ona görə baş verəcək ki, ekoloji cəhətdən olduqca çirkli bir rayonda necə müasir bir şəhər salındığını görmək onlar üçün də maraqlı olacaq. Bu iki mərkəzi isə bir birindən cəmi 4 kilometr məsafə ayrımaqdadır. Üçüncüsü və ən əsası isə insanların yaradılış olaraq yeniliklərə maraqlı olması amilidir. Təsəvvür edin, Bakının indi mərkəz hesab edilən istənilən bir rayonunda yaşayan bir insan illər boyu, hər gün mərkəz hesab etdiyi həmin ərazidə istər tarixi ilə, istərsə də memarlıq üslubu ilə bir-birindən kəskin fərqlənən yorucu mənzərəni görmək yerinə Ağ Şəhərdə, Retro Parkda mənzil sahibi olur. Artıq hər səhər evindən küçəyə çıxdıqda tam başqa ab-hava hiss edir, tam başqa memarlıq ansamblının rahatlıq verən gözəlliyini görür. Sanki dünyanın ən inkişaf etmiş bir ölkəsində yaşayırmış kimi yeni bir həyatın içində presitijin həzzini dadır. Hər şey yenidir, müasirdir, ahəngdardır. Hər şey dəyişikdir, bircə həmişə dəyişməz olaraq qalmaqlarını istədiyi əzizləri, dostlar və yaxınları dəyişməmişdir... Və bütün bu üstünlüklər və gözəlliklər fonunda əlbəttə ki, Ağ Şəhərdə yaşamaq, işləmək və asudə vaxt keçirmək hər bir insan üçün əvəzedilməz bir faktora çevriləcək.

 

Tarix: 22.01.2015 

Müsahibə rubrikasına qayıtmaq