“AREA” şirkəti ilə müsahibə

Saytımızın Dəyərli Ziyarətçiləri,

“AREA” daşınmaz əmlak agentliyinin Baş Meneceri Yalçın Osmanovla Azərbaycan daşınmaz əmlak bazarı və bazarda olan tendensiyalar ilə bağlı qısa müsahibəmizi sizə təqdim edirik.

Həmsöhbətimiz barədə qısa məlumat

1976-cı ildə Bakı şəhərində anadan olmuşdur. Azərbaycan Dövlət İqtisad Universitetini bitirib. 17 ildir ki, Azərbaycan daşınmaz əmlak bazarında fəaliyyət göstərir. Əvvəllər "GeoEko" daşınmaz əmlak agentliyində aparıcı əməkdaş kimi çalışıb, 2008-ci ildə AREA ("Azerbaijan Real Estate Agency") Azərbaycan daşınmaz əmlak agentliyinin həmtəsisçilərindən biri olmuşdur.

 

Müsahibə

Hörmətli Yalçın müəllim, zəhmət olmazsa rieltor şirkətinizin fəaliyyəti barədə bir qədər məlumat verərdiniz.

Şirkətimiz 2008-ci ildən etibarən Bakı şəhərində orta və elit sinfə məxsus daşınmaz əmlakla bağlı hər növ əməliyyatların reallaşdırılması ilə məşğuldur. Biz həmçinin daşınmaz əmlakın idarə olunması xidmətini də təklif edirik. Azərbaycanın aparıcı tikinti şirkətləri ilə fəal şəkildə əməkdaşlıq edirik. Əlavə olaraq, şirkətimiz Türkiyədə daşınmaz əmlak alqı-satqısı və icarəsi xidmətləri təqdim edir.

Azərbaycan daşınmaz əmlak bazarında bizim missiyamız – Azərbaycanda rieltor xidmətinin səviyyəsini ümumdünya standartlarına yüksəltməkdir.

 

Fikrinizcə, hansı növ daşınmaz əmlak (köhnə/yeni tikili) alıcıları daha çox maraqlandırır? Mümkünsə öz təcrübənizə əsaslanaraq hər hansı statistik göstəricilər nümunə göstərəsiniz.

Hazırda əhali arasında yaşayış üçün hazır vəziyyətdə olan yeni tikililərə böyük tələbat müşahidə olunur. Sərfəli yaşayış yeri seqmentində alıcılar uzunmüdətli ipoteka krediti olan daşınmaz əmlakın alqısına üstünlük verirlər. Yüksək tələbatı nəzərə alaraq hazırda elit yaşayış yerlərinin defisitliyini qeyd etməliyəm.

 

Necə düşünürsünüz, paytaxtımızın mərkəzi hissəsində kvadrat metrin qiymət artımında limit mövcuddurmu? Hazırda bu qiymətlər 2500 AZN və daha çox məbləğ arasında dəyişir. Nə vaxtsa ele bir daha yüksək qiymət həddi formalaşacaqmı, hansı ki, bundan sonra qiymət artımının müşahidə olunacağını gözləmək artıq ağlasığmaz olacaq?

Fikrimcə, hansısa bir hədd mövcuddur, amma təbii ki, hər şey nisbidir. Eyni zamanda, xatırladım ki, Bakı neft ölkəsinin paytaxtı və iqtisadi mərkəzi olduğu üçün böyük biznes nümayəndələri məhz burada yaşayır, işləyir və onlara da təbii ki, yaşayış yeri lazımdır.

 

Нal-hazırda maraqlı tendensiya müşahidə olunur. Paytaxt əhalisinin müəyyən hissəsi əhalinin sıx məskunlaşmadığı Masazır və nisbətən mərkəzdən uzaq olan Xırdalan kimi sakit yerlərdə yaşamağa üstünlük verirlər. Bu ərazilərə daşınmaz əmlak alıcılarının axını çoxalır. Bunun nə ilə əlaqədar olduğunu düşünürsünüz? Bu, insanların torpaq sahəsi alaraq orada ev tikmək istəyi və ya şəhərin mərkəzi hissələrində daşınmaz əmlak qiymətlərinin daha yüksək olması ilə əlaqədardır?

Doğrudan da, qeyd etdiyiniz tendensiya hazırda müşahidə olunur. Masazır və Xırdalan ərazisinə alıcı axını kifayət qədər çoxluq təşkil edir. Bu hər şeydən öncə mövcud qiymət siyasəti ilə bağlıdır. Həmçinin, bu ərazilərin paytaxta yaxın rayonlar hesab olunması faktoru da rol oynayır. Qeyd etmək lazımdır ki, insanlar özəl yaşayış sahələrində yaşamağı üstün hesab edirlər. Təəssüf ki, bizdə bu sektor bir o qədər də inkişaf etməyib. Planlaşdırılmış tikili, infrastruktur, elementar təhlükəsizlik sistemi mövcud deyildir. Adəti üzrə şəhərdə və şəhər ətrafında tikililər (özəl yaşayış sahəsi nəzərdə tutulur) qarışıq, sistemsiz vəziyyətdə tikilir. Mühəndislərin bu məsələlərə xüsusi diqqət yetirmələrini tövsiyyə edirəm.

 

Azərbaycan daşınmaz əmlak bazarını 5 il sonra necə görürsünüz? Hansısa müsbət dəyişikliklər, yeni tendensiyalar və s. müşahidə olunacaqmı?

Mənim proqnozuma əsasən Azərbaycan daşınmaz əmlak bazarının perspektivi kifayət qədər uğurludur. Düşünürəm ki, yaxın 5 il ərzində daşınmaz əmlak bazarı daha tənzimlənən forma alacaqdır. Düzgün qaydada layihələndirilmiş, paytaxtın xarici görünüşünə uyğun tikililər inşa ediləcək. Tikilən binaların təhlükəsizliyinə dövlət orqanları tərəfindən ciddi nəzarət davam edəcək.

 

Tarix: 07.10.2014 

Müsahibə rubrikasına qayıtmaq